Út að borða með Speederman !

í kvöld fór ég út að borða með Speederman!Hann hegðaði sér óaðfinnanlega meðan hann borðaði salmmonellufrían kjúkling og ofnbakaðar kartöflur og drakk sprite úr staupglasi. Eftir matinn fór hann að sýna listir sínar og sveiflaði sér af miklum ákafa í rómantísku  garðrólunni minni - rólu sem ég segi að sé bara fyrir gamlar konur eins og mig Rólan er ekki gerð fyrir Speederman, sagði ég. Hann hlustaði ekkert á mig og rólaði bara hraðar og hraðar. Allt í einu fór rólan of hratt fyrir Speederman og hann hentist úr rólunni með miklum dynk. Ég greip í róluna svo hann fengi hana ekki á fljúgandi ferð í hausinn. Ekki var laust við að Speederman væri með auman kropp eftir byltuna- merkilegt ég sem hélt hann þyldi allt. Já í kvöld var það Speederman sem heiðraði mig með nærveru sinni, en í síðustu viku  borðað ég kvöldverð með Íþróttaálfinum  og bruddi gulrætur af mikilli innlifun. Batman er einnig skemmtilegur að snæða með ,svo ég tali nú ekki um hve kátt er í kotinu , þegar Darth Vader birtist í fullum skrúða ,með ljóssverðið sitt og sveiflar því í allar áttir. Eitt eiga allar þessar fígúrur sameiginlegt að það er litli snáðinn minn sem gefur þeim líf og limi. Lifir sig inn í hlutverkin af þeirri alúð sem einungis börn geta gert. Gleymir hreinlega að hann er bara fimm ára mömmusnáði og ný byrjaður í alvöru skóla. Gaman að vera fimm ára og eiga fullt af átrúnaðargoðum !

Kettlingarnir voru út í garði í dag og létu öllum illum látum - tveir af kettlingunum hafa fundið sín átrúnaðargoð! Snúður og Snælda eru þeirra fyrirmyndir - þarf ég nokkuð að segja meira

Vegir viskunnar:það er ekki hægt að stytta sér leið til óskastaðarins.         

    

Athugasemdir

[Silla systir (IP-tala skráð) 17.8.2008 kl. 12:47]

Já það jafnast ekkert á við mömmusnáða. Ég bað Snallann  lengst allra orða um daginn að fara nú ekki í dópið þegar hann yrði eldri. "Er til dóp á Íslandi" spurði hann þá. Þó hann sé að verða 13 ára er hann ótrúlega saklaus í hugsun og sér það besta í öllum. Og er Daníel ekki bara upprennandi leikari. Silla sys